Njengoba iphasi sele litjuguluka nje lamukela indlela yanamhlanje yokusebenza, lokho kukodwa kufaka, isiko, amagugu Kanye nesintu engozini yokutjhabalala ngoba lesi s’khathi sanamhlanje sele simumethe ipilo yobu khazikhazi Kanye nobuqwephetjhe besi manje manje. Yeke ukugidinga iminyanya yamasiko, amagugu, isintu nobu rhwari kuyindlela enamandla yokugcina nokubuthelela isimilo nesithunzi yesintu.
Ngalokhu irhubhululo liveza bona iminyanya le ngiyo ekwazi ukuveza nokuhlaziya imvelaphi yomuntu ngoba kula sikwazi ukubona khona bona umuntu uvunula njani begodu ngengiyiphi indlela ekufuze aziphathe ngayo.
Kanye hlangana neenzathu ezikhona zokugidinga iiminyanya yamasiko namagugu, kuvikela imvelaphi yesintu nesiko, kuvikela amagugu wesintu Kanye noku buthelela ilwazi ngepilo hlalo yesintu. Nasi dzubhula ekulumeni kaNdabezitha uMkhambi ll Mahlangu, kunala alaya khona ilutjha bona lingarhulupheli amarhugu kodwana lizibuthelele, lihloniphe isintu begodu lisithande isintu lingalahla nefundo. Ngalawo magama uNdabezitha bekahlosa ukwakha ilutjha begodu alinga nokulivezela bona ukugidibga iiminyanya yamagugu kungeminye yemithombo yelwazi yokwazi ngemvelaphi ye’skhabo lomuntu. Yeke iminyanya le ingezinye zendlela zokubuthelela amagugu nokuwa fukamela ukuze ahlale aphephile begodu aphilile.
Iminyanya le ingezinye zezinto zokuthuthukisa ivakatjho bukela enarheni ngombana kiyo vane kusuke nabantu ababuya ennarheni ezinye Kanye neefundeni ezinye ezihlukileko bazoku funda ngepilo hlalo kandebele kanye noku gidinga, yeke lokhu kuletha umnotho kuqede netjhirho ngombana kusuke kube nabantu abathengisa uburhwari babo ngibala abantu abafana nabo Thando Mahlangu, Nqobile Masuku, umma uNosinki uSkhumba La Masango Kanye nabanengi, laba, bantu ngaphandle koku thengisa uburhwari babo, badlala indima ekulu ekuthuthu kiseni isiko pilo yamandebele nokuvikela isiNdebele, yeke eminyanyeni yama gugu kula bakwazi khona ukuveza noku khangisa ubuhle besiko pilo kandebele begodu kula abantu ababuya kwezinye iinnarha neemfunda bakwazi ukufunda ngesiko pilo kandebele, kungakho ukugidingwa kweminyanya yamagugu kuqakathekile begodu kungasiyinto ekufuze iphelele emoyeni namkha ebaleni.
Yeke lokhu kukodwa kuyakhombisa bona ukugidinga iminyanya yamagugu akusi mayelana nokuzi jabulisa kwaphela kodwana kumayelana noku zikhakhazisa, ukurhwebelana ngoburhwari nomvumo Kanye nokwabelana ngelwazi lepilo hlalo khulukhulu nokuvikela isintu namagugu njengoba kilesi’skhathi sanamhlanje izinto sele zitjhuguluke khulu begodu ukutjhuguluka kwazo sele kululazeke isintu Kanye nepilo hlalo yesiko nekambiso yabokhokho. Yeke ukugidinga iminyanya yesintu kuyindlela yokuvikela nokufukamela Ubuntu kanye nesintu begodu lokhu kurhelebha khulu ekutheni amagugu nepilo hlalo Kanye nesintu kudluliseke lula eenzukulwaneni ezikhona nezizako lokho kukodwa kuligugu.
